“Meri Zindagi………………”

Thodi uljhi hai to kabhi Suljhi si hai…..
Kabhi hairaan ..Kabhi Pareshaan si hai….
Kabhi khili khili dhoop to kabhi bilkul bejaan si hai…
Kabhi hai uska thikana ..to kabhi gumshuda si hai…!!
Kabhi lagti hai apni …to kabhi bhut anjaan si hai..!!

Dhundhun main kabhi aangan mein to milti hai chhipi kone mein….
Hoti nahi jab vo kareeb ..darr lagta hai usko khone se….!!

Akele raah mein khadi na jaane kya Taakti hai…
Na koi tha humsafar kabhi uska… jane fir kisko duaaon me maangti hai..!!
Kya khoya ab tak usne ..uska to koi hissaab nahi…
Kya paya hai ..uska bhi koi uske paas jawaab nahi….!!

Har pal darti hai …. Kuch kahna hai use ,na jane fir kyun Saham jati hai…..
Jane kisko Khone ke darr mein vo roj thoda sa aur marr jati hai…!!

Usko khabar nahi shayad ke aayengi khushiyaan sirf uske muskurane se….
Aarju hai vo lag jaye gale ek baar aakar kisi bahane se…!!
Par na jane kab hoga usko ye Ehsaas ….
Kiski kami hai usko kyun hai vo khud se itni Udaas…!!

Badlega kabhi ye banjar mausam ..hogi kabhi uske aangan bhi khushiyon ki Barsaat…!!
Dua hai na honge fir uske ghar Sannate … na rahegi Khamoshi bhari raat….
Khwahish hai dekhun “Zindagi” ko apni main hanste hue .. Bas Ek baar…!!

- Parul Bhatnagar ( 18-Aug-09)